Schprih und Huigärte

Dr Hofrat Reh isch faschd jedan Dag is Kronkehüs nüs gloffe, und do ischa allad bum Binzle dur und hod a baar Woard vrhuigarded. Iez isch dr Binz amol id do gwea, sis ischa all Däg voarhuß gschdonde. Am ondre Dag froged dr Hofrat, wo a nächt gwea sei. No hods Binzle gseid: „Woll, nächt bine uf ar Lieh vu nar Bäs z’ Lindebearg gwea, und schdell dr voar, die isch mid 96 Johr ohne jede ärztliche Mithilf gschdoarbe.”

Bäschles Englbert hod ‘s Vieh vum Esch ring gholed. Kieh sind schu allui huim gwea, und ea isch mid de Kälble nochekumme. Iez wie na bum Schüechdar Schratt rüf kud, seid Schüechdars Josef: „Du kinschd dine Kieh öu bessr zieche, all Däg schießed die mir voar de Schdeffl hi.” No hod Englbert gseid: „Sagenas grad seal, ded voane bum Schdangar löufed se no.”

Do sind se öu amol ir Reschdratio am Schdammdisch ghocked, no hod Müsse Done zum Logelar gseid: „Du bischd bigodd schu reachd gwamped, du soddeschd a wink abschbeacke, sis kinnd es sing, daß de z’ Nacht zmol a Schlägle krieschd und am Moarge toad vrwacheschd.” No hod dr Otto gseid: ,,Z’ Nacht firchd ‘be am wenegschde voar am Schlägle, do schlofft Sui wie a Molle.

Dr Wannebür isch wiedr amol uffem Grichd gwea, weags Händl, und do hodda desmol id gonz reachd kried. Wo na huimkomme isch, do ischa no zum Adlarwirt gange. Det hodden Gigars Wilhelm gfroged, ob a gean uff s Gricht gang, no hodda gseid: „Ih schu, wenn de ded die Hearre so alüegeschd, do bischd no lang id dr Minschd.”

A dr drift Schiflugwuche sind öu fümf Jugoslawe drbi gwea und dr beseht hot Rudi Finzgar gheiße. Ma isch doa öu no seggs Däg gschprünge, ja a gonze Wuche. Dr Rudi hot an roate Glonz-Leadr-Anzug ghett und dea isch doch jedsmol grodlet. Ja, öu de ondre Jugoslawe sind a paarmol grodled. Do hobba no a paar Schprüng mea mache kinne am Tag as wie huit, und wo dr Rudi Finzgar ‘s viertmol ra rodlet, hot Millnudlars Alfons gseit: „Ih mui, s Weattr loht um, die Jugos flieged so niedr.”

Lonzars Hans hot z’ Rübe dünda a Hisle büt, und wenn a no homma gwea isch und züekehrt, no hodda denn schu vrzelle kinne: „Geabed bloas Obacht, daß dr de letschte Markschbrissel do homma vrhebed. Wenn nena dea üskut und du zuichscht bloas uf Rube na, no haißt ba de glei an Ündrländar, und wenn de no uina gar it mag, no seit a no ,dreckeda’ drzüe.”

Max Th. isch em Gmuindsrot gwea, und noch ar Sitzüng ischa no bum Sunnekealar züe khert. Det hocked dr Stammtisch ebevool, und se hend grad dean Huigärte, wo ba voarhea bur Sitzüng Beschluß gfaßt hot. Wie na des heart, seit a zu deam Woartfihrar: „He, bis du schtill und laß mi vrzelle, ih kumm grad vu dr geheime Sitzüng.”

Max B. isch widr amol uf Minke gfahre und hot se am Voartag am Bahnscholtar vrfroged, wela Zug am gschickteste zum Inge- und wiedr zum Rüsfahre sei. No hod dea Maa am Scholtar gseit: „Wenn de am Moarge urn vietlend Seggse fehrscht, no hoschte z’ Immeschdadt glei an Anschluß.” No hot dr Max gseid: „Des brüch e desmol kuin, Käthr fehrt moan seal mit.”

Schluttars Babischt vum Jöuche hot mit sing Schwester zemed ghofed. Die isch is Ölter öu allad beasr woare, abr ea isch halt öu a mords Kerle gwea. No hodda amol uf dr Ritte vrzellt: „Je weneger ming Schwester Zäh hot, umso bisseger wird dea Koog.”

‘S olt Binzle hod amol gseit: „Wemba weiß, daß a Pfund Oggsefleisch huit a de nuinzg Pfenning koschded, no mißt doch a Gschieda üsreachne kinne, was dr gonz Gmuindsrot koschded.”

Dr Rubingar Gaißar isch mibba em Hoibat a nam Bichl gflacked. No isch a Bür dur, dean wo des a wink g’irrt hot. No seit a züenem: „Du hosch no schi, de gonze Dag aso umanond flacke.” No hot dr Hirt gseit: „Liebr dät i schu gar nuiz!”

Dr Richtar hot a Bruiarie khedd und a etle Wirtschafta, ja as isch a riicha Ma gwea. Iez hobba amol uf de Herbst hi zwei nuie Roß hea dong. Mit deana isch ba öu jedan Dag is Walsartal ingegfahre. Wo Nazle Ludwige Flora die nuie Roß siecht, hot se deana lang nocheglüeged und no zur Schwester gseit: „Iez lüe dohea, des Richtarle düet solang reacht brichele, bis en Gmuind vrholte ka.”